उनी मधुवनकि मयुर पङ्ख
तँ रबर ब्याण्डको चुङ्गी
उनी रेशम झैं मुलायम
तँ खद्दरको खस्रो लुङ्गी
उनी महासागर झैं सहनशील
तँ उर्लँदो खहरेको भेल
हैंन कसरी भयो यो मेल
तैले पक्कै गरिस केही झेल ।
उनी महाकविकी सकुंतला
तँ ऋषी धमलाको हमला
उनी कोमल कमल समान
तँ काँडे सिउंडीको गमला
उनी ईम्पोर्टेड पाउडर क्रिम
तँ लोकल चमेलीको तेल
हैंन कसरी भयो यो मेल
तैले पक्कै गरिस केही झेल ।
उनी लुम्बिनीको शान्ती वन
तँ माछा बाज़ारको हल्ला
उनी सिंहमरमर की ताजमहल
तँ अोथारो बिग्रेको चल्ला
उनी द्रुत गती को बूलेट ट्रेन
तँ जनकपुरको पत्रु रेल
हैंन कसरी भयो यो मेल
तैले पक्कै गरिस केही झेल ।
उनी चन्दन वनको सुगन्ध
तँ भुइ कटहरको छाला
उनी मोहनी काञ्चन काया
तँ ओम पुरी को गाला
उनी ज्ञान गुण की उद्धरण
तँ लोद्दर परिक्षा फेल
हैंन कसरी भयो यो मेल
तैले पक्कै गरिस केही झेल ।
उनी पूर्णिमाकी उजेलि जून
तँ मट्टीतेल को टुक्की
उनी निलस्तरीय सोमरश
तँ खोया बिरके चुस्की
उनी आलीशान सिशमहल
तँ भद्रगोलको जेल
हैंन कसरी भयो यो मेल
तैले पक्कै गरिस केही झेल ।
उनी वायुपङ्खी अश्व जस्ती
तँ चिडियाघरको भालू
उनी अप्सरा हृदयमोहिनी
तँ प्लटिङ बिग्रेको तालु
सुशील मीरा र झूसिल किराको
यो हरी विजोग प्रेमको खेल
हैंन कसरी भयो यो मेल
तैले पक्कै गरिस केही झेल ।
तैले पक्कै गरिस केही झेल ।
(नोवेम्बर १७, २०१८ मा आयोजित 'नाफा-साहित्य साँझ २०७५' अन्तर्गतको 'बिजय मल्ल साहित्य पुरस्कार'मा वाचन गरिएको सहभागी प्रतियोगी कविता)
No comments:
Post a Comment