कविता : सोंच

~अर्चना धाख्वा~

ल्याई दिन्छु पूर्णिमाको, चन्द्रमा चुण्डाइ
तिम्रो पाउ जोगाउन्छु,  धरतीमा फूल बिछ्याई

यो कसम पूरा भयो भएन,
मेरो पाउले जमीन छोयो छोएन

यो अब उसको, देन भन्दा छ टाढा
मेरो मनमा गढेको, भावना छ गाढा


यो पृथ्वीको ढुङ्गा, काँडा हिलो मैलो
फूलेछ मेरो दृष्य मा, गुलाफ भएर

आकाश अँध्यारो लाग्छ मलाई
बसेछ  जून, म भित्रै  ज्योति छरेर

साँचो हो या झूठो म किन खोजुं
मेरो सोचलाई प्रश्न म किन सोधुँ

सुख को भूमरीमा मेरो बसाइ छ आज
किन भ्रम त होइन यो, भनिकन सोचूं

मेरो लागि उसको त्यो भावना प्रबल भो
यथार्थ यहि नै हो, मेरो प्रेम अमर भो

(२०१औं भानु जयन्ती, जुलाई १२ २०१४ - आविष्कार-अप्सरा भारतीको डेरामा भएको 'नेपाली कोठे साहित्य कार्यक्रम')